الاثنين، 15 أغسطس، 2016

حول قرض صندوق النقد الدولي لمصر :

 حول قرض صندوق النقد الدولي لمصر :

تعالوا نتعلم الاقتصاد ببساطه ... قروض صندوق النقد الدولي
----------------

كلام كتير قوي معظمه غلط بيتقال علي قرض صندوق النقد الدولي لدرجه الحقيقه تخلي اي خبير اقتصاد يسيب المهنه. النهارده حنتعلم ايه هي قروض صندوق النقد الدولي و ايه أنواعها و أهدافها و ايه هو صندوق النقد الدولي و بيشتغل ازاي أساسا و بيجيب فلوس منين أصلا. و ليه لما يزيد حجم القرض معني كده ان البلد المقترضه واقعه في مشكله كبيره مش العكس زي لما بيتقال. حنحاول نبسط الامور جدا و كله بالمصادر.
الحقائق حول من طلب القرض:
----------------

في يوم ٢٨ يوليو ٢٠١٦ ظهر المتحدث بأسم صندوق النقد الدولي السيد ويليام موراي في حديثه الاسبوعي مع الصحافه و اجاب عن السؤال التالي (مصدر ١):
- ديفيد لاودر من رويترز: هل يمكنك ان تلقي مزيد من الضوء حول تعامل الصندوق مؤخراً مع مصر. كما تعلم ظهر وزير الماليه في مصر و قال ان مصر تبحث عن برنامج مع الصندوق و ذكر ارقام تبلغ ١٢ مليار دولار خلال ٣ سنوات. اليوم أعلنت وزاره الماليه انهم يتوقعون علي الأقل ٢ مليار دولار. هل تستطيع تأكيد هذه الأرقام و اي تفاصيل اخري عن البرنامج مع مصر.
- ويليام موراي: شكرًا علي ذلك السؤال ديفيد. و اريد ان أقول اننا تلقينا اسئله عن ذات الموضوع علي الانترنت و من مصر و سنجيب عن تلك الاسئله الان.
دعوني أتراجع قليلا و أوضح اين نقف من مصر و بعدها سأجيب عن سوْال ديفيد.
طلبت السلطات المصريه من الصندوق ان يوفر دعما ماليا لبرنامجهم الاقتصادي. فعلوا ذلك في يوم ٢٦ يوليو الموافق يوم الثلاثاء الماضي. نحن نرحب بهذا الطلب و نترقب النقاشات مع المصريين حول كيف نساعد مصر في ان يتعاملوا مع تحدياتهم الاقتصاديه.
كما ذكرنا فان هدفنا ان تعود مصر للاستقرار الاقتصادي و ان نساعد في حدوث تنميه مستدامه ذات وظائف كثيره في مصر. ان فريق من الصندوق بقياده كريس جارفيس مفوض الصندوق في مصر سيزور القاهره بدءا من الغد. و ستسمر الزياره أسبوعين. و سنعلن عن نتائج الزياره.
بالنسبه لحجم البرنامج. فان هذا سيعتمد علي تقدير فريق بعثه الصندوق لاحتياجات مصر الماليه و لقوه برنامج السلطات هناك للإصلاح. لكن لا أستطيع الان إعطاء ارقام محدده لان الوقت مبكّر.
أودّ ان اذكر الجميع و هذه معلومات عامه، ان حصه مصر في الصندوق تبلغ حوالي ٢ مليار وحده سحب خاصه sdr. و كما تعرفون فان ما نقرضه مرتبط بتلك الحصه.
- ديفيد لاودر: و لكن بالطبع يمكن ان يكون القرض مضاعفات للحصه.
- ويليام موراي: علي عده سنوات. نعم. و لكن لا أستطيع ان اعطيك ارقام محدده الان.
- ديفيد لاودر: بالنسبه لبرنامج الإصلاح، ستذهب البعثه و يبحثون عن الحقائق و يتوصلون لنتائج. و لكن ما هي نصيحتكم لهم حتي الان؟
- ويليام موراي: بالطبع تحدثنا عن الفصل الرابع من اتفاقيه الصندوق. لا أودّ ان اظهر اننا نعطي روشته محدده لبرنامج الإصلاح و التي قد تبدو انها شروط الصندوق. و لكن بالطبع يجب ان أحيلكم لما قلناه في السابق عن مصر. و لكني متردد الان ان ادخل في تفاصيل. مصر عندها الكثير من الصعوبات الاقتصاديه و نحن هناك كي نساعدهم.
ايه اللي فهمناه لحد دلوقتي؟
١- فهمنا ان مصر طلبت قرض من الصندوق يوم ٢٦ يوليو.
٢- ان مفيش ارقام محدده للقرض لسه و ان اي كلام عن حجم القرض لسه بدري عليه و اننا حنعرف معلومات أوليه عن كده مع حلول يوم ١٤ اغسطس. علي فكره أكيد بعثه الصندوق حترجع امريكا بعد يوم ١٤ اغسطس لان دي بدايه المدارس و الجامعات في معظم امريكا و معظم الابهات و الأمهات عاوزين يكونوا موجودين مع دخول المدارس.

٣- ان حجم القرض مرتبط بحصه مصر في الصندوق و حاجه اسمها وحده السحب الخاصه و احنا متاكدين ان معظم القراء مش فاهمين ده يعني ايه. و احنا حنوضح ده في الفقره اللي جايه.
٤- ان مصر بتعاني من مشاكل اقتصاديه كبيره. و ان الصندوق نفسه بيقول كده و ان وظيفه الصندوق ان يساعد الدول تطلع من الأزمات الاقتصاديه دي.
٥- ان فيه حاجه اسمها الفصل الرابع من صندوق النقد الدولي و ده موضوع مش مفهوم خالص و احنا طبعا حساسين لأي حاجه فيها كلمه الفصل!
طيب تعالوا بقي نفهم ازاي الصندوق بيشتغل و من كده حنفهم ايه معني حصه مصر في الصندوق و ايه معني وحده السحب الخاصه دي او ال sdr.
كيف يعمل صندوق النقد الدولي:
-------------------------

وظيفه صندوق النقد الدولي انه يساعد الدول الاعضاء تحقق استقرار اقتصادي. الفكره الاساسيه ان بعض دول العالم ممكن يجيلها فتره يبقي عندها مشاكل في مصادرها من العملات الاجنبيه او انها بتستورد أكتر بكتير مما بتصدر. الدول دي ممكن تلجأ لأساليب للسيطره علي كده زي مثلا اجراءات تمنع الاستيراد او تقلله جدا و دي اجراءات ممكن يبقي لها اثر سيئ علي المدي البعيد بالذات مثلا لو منعت استيراد معدات الانتاج مثلا. و بالتالي صندوق النقد الدولي بيتدخل يساعد الدول دي انها تتغلب علي المحنه الطارئه بدون ما تعمل ضرر ضخم علي الاقتصاد علي المدي البعيد.
طيب ده كلام جميل. الصندوق بيجيب فلوس منين؟
كل بلد في العالم شايله في صندوق النقد الدولي احتياطي محدد اسمه حصه الدوله في الصندوق. الاحتياطي ده مقنن وفقا لاتفاقيه تأسيس الصندوق. الاحتياطي ده بالتقريب يتناسب مع حجم و قوه اقتصاد كل دوله. مثلا امريكا عندها حصه مقدارها ٨٢ مليار وحده سحب خاصه. يليها اليابان عندها ٣٠ مليار وحده و الصين ٣٠ و بعدين المانيا ٢٦ و هكذا. في مقابل الاحتياطي ده او الحصه دي كل دوله عندها أصوات في مجلس اداره الصندوق تتناسب مع حصتها (مصدر ٢). لذلك طبعا امريكا لديها اكبر عدد أصوات لان اقتصادها الأكبر و الاقوي. لكن طبعا مش التأثير الوحيد. امريكا عندها فقط ١٧٪ من الأصوات.
من تجميع الفلوس من كل دول العالم، الصندوق لديه حوالي ٤٠٠ مليار وحده سحب خاصه جايه من كل دول العالم و هي دي اللي بيقدر يستخدمها .
انت تقدر تفكر في وحده السحب الخاصه special drawing right دي انها زي ما تكون عمله. العمله دي عباره عن مجموعه عملات مع بعض. كل عشره sdr عباره عن ٤ دولار و ٣ يورو و ١ ارمبي صيني و ١ ين ياباني و ١ جنيه إسترليني (مصدر ٣).
مصر شايله مع صندوق النقد الدولي ٢ مليار وحده سحب خاصه. اللي هم تقريبا ٨٠٠ مليون دولار. ٦٠٠ مليون يورو ٢٠٠ مليون ارمبي صيني. ٢٠٠ مليون ين ياباني. ٢٠٠ مليون جنيه إسترليني. الفكره انها تبقي سله عملات انها متتأثرش بالتذبذب النسبي بين أسعار العملات العالميه. عشان لما دوله تقترض بعمله واحده و العمله دي ترتفع قوي او تنخفض قوي ده ممكن يؤثر علي اقتصاد الدوله دي بشده. و في الغالب الدوله دي اللي جايه تقترض مش ناقصه تذبذب. لكن لما الاقتراض يكون بسله عملات بيبقي التذبذب اقل بكثير.
صندوق النقد الدولي بيستخدم الفلوس دي انه يقرض الدول للتغلب علي ظروف اقتصاديه محدده و لفترات محدده. حنفهم في الفقره الجايه انواع القروض ايه. لكن قبل كده. واحد ممكن يسأل و يقول يعني الصندوق بياخذ فلوس مننا عشان يسلفها لنا تاني. ايه النصب ده. الحقيقه ان الفكره ان اي دوله ممكن تحتاج مضاعفات من حصتها للاقتراض. و حنشوف ان المضاعفات دي بتعتمد علي نوع القرض و الفايده كمان بتعتمد علي نوع القرض.
و علي فكره طول لما بلد سايبه فلوسها مع الصندوق البلد دي بتاخد فايده عن الفلوس دي. يعني مصر طول ما هي سايبه فلوس مع الصندوق من سنه ٢٠٠٠ و هي بتحصل فايده من الصندوق. الفايده دي بتيجي من القروض اللي بيسلفها الصندوق للدول التانيه. الصندوق ذات نفسه مش بيعمل ارباح عكس البنوك مثلا.
طيب واحد يسأل ليه بلد زي امريكا مش محتاجه تقترض من الصندوق بتحط فلوس عنده و هي كمان مش محتاجه فايده منه؟ الاجابه هي حاجتين. الاولي من مصلحه امريكا استقرار النظام المالي العالمي لانها طبعا علي قمه المستفيدين من هذا الاستقرار. كمان من مصلحه امريكا يكون لها تاثير مهم في توجيه تلك القروض. طبيعي يعني انك تنشئ نظام مالي و تهتم باستمرار تأثيرك فيه.
قبل ما ننقل علي انواع قروض الصندوق، تعالوا نفهم ايه معني الفصل الرابع من اتفاقيه الصندوق ده؟
الفصل الرابع من اتفاقيه صندوق النقد الدولي:
--------------

الفصل الرابع ده بيحدد ان الصندوق يعطي مشاورات و نصائح للدول الاعضاء عندما يري مشاكل محدده في تلك الدولار عندما تستدعيه تلك الدول (مصدر ٤).
ده لان جزء من مهمه الصندوق هي عمل مسح دوري لكل دوله في العالم و تتبع أوضاعها الاقتصاديه.
الصندوق بيكتب بالتاريخ كل مره حصلت فيها المشاورات دي. لو بصيت في مصدر ٤ حتلاقي ان المشاورات دي مع مصر حصلت في ايام:
٨ يوليو ٢٠١٦
٢٥ سبتمبر ٢٠١٥
٣٠ يوليو ٢٠١٤
٢٥ يناير ٢٠٠٨
٢٥ يناير ٢٠٠٦
٢٦ يوليو ٢٠٠٤
٢٤ مارس ٢٠٠٣
٢٨ اغسطس ٢٠٠٠

يعني من ٢٠٠٨ محصلتش مشاورات الا في ٣٠ يوليو ٢٠١٤ ثم اصبحت من بعد ذلك كل عام. بص علي التواريخ كويس و انت تعرف ان مشاكل مصر الاقتصاديه تتفاقم منذ ٢٠١٤!
شروط قروض صندوق النقد الدولي:
--------------------

نركز بقي قوي هنا لان الناس كلها متلخبطه قوي قوي في الموضوع ده.
اولا صندوق النقد الدولي عنده مبدأ مهم جدا اسمه الاشتراط conditionality. المبدأ ده معناه انه مفيش تسليف لحد من غير شروط و من غير ضمان. المبدأ ده تم إقراره في الخمسينات (مصدر ٥). مفيش حاجه اسمها بلد تستلف من غير شروط و من غير ضمان الا اذا كانت من الدول الأفقر في العالم زي أفغانستان او اليمن. لذلك اي حد يقولك مصر تفرض شروطها علي الصندوق هو كلام فارغ تماماً. اللي بيحصل ان الصندوق بيطلب اما برنامج اقتصادي محدد يضمن ان الدوله تقدر تسدد ديونها للصندوق لاحقا بعدما تتعافي او انه يطلب ضمانات مؤكده يتحصل عليها في حاله العجز عن السداد. طبعا كل لما الصندوق يبقي مطمئن ان البرنامج الاقتصادي للدوله قوي و مضمون النجاح كل لما مطالب الضمانات تقل و العكس صحيح.
ممكن جدا ان الصندوق لو معجبوش برنامج مصر للإصلاح انه يطلب ان مصر تعطي ضمان سداد القروض من دخل قناه السويس مثلا. او يطلب ضمان سداد من السعوديه كاقتصاد كبير في الإقليم. و ممكن السعوديه تقول مش حأدي الضمان الا لما مصر تسلم المطلوب. و عارفين ايه هوه المطلوب. و هكذا.
طبعا الصندوق يفضل ان يكون فيه برنامج للإصلاح اللي هوه في الأغلب برنامج تقشفي.
اللخبطه عند الناس ان الصندوق مش بيقول ان برنامج الإصلاح لازم شكله يكون كده او لازم تشيل الدعم او لازم تعمل كذا. لا. هو بيقول لو انا اقتنعت ان برنامجك كويس مش حأطلب ضمانات.
الصندوق عاوز يتأكد ان الدوله حتدفع القرض. لذلك هدفه دائماً هو ان الدوله تقلل عجز الموازنه و تقلل الانفاق علي الشعب. أكيد. لان كل ما الدوله قللت الانفاق حتوفر فلوس تدفعها للصندوق. لذلك اهم حاجه عند الصندوق هي تقليل الانفاق. يعني التقشف. تاني اهم حاجه عند الصندوق ان الدوله متضيعش حصيله العملات الصعبه عندها انها تحافظ علي سعر عملتها. ببساطه لان اي فلوس رايحه لتثبيت سعر عمله الدوله قدام الدولار هي فلوس عمله صعبه ممكن الدوله دي تستخدمها في دفع قرض الصندوق.
طيب تعالوا نفهم انواع قروض صندوق النقد الدولي:
-------------------

١- اول نوع من قروض الصندوق اسمه الأقراض المتنازل.
Concessional lending
الاقراض ده اسمه متنازل لانه متنازل عن الفايده. الاقراض ده بيروح للدول الأفقر في العالم. يعني اليمن و افغانستان مثلا.

الدول دي يتم أعفاؤها من دفع الفايده علي فترات سماح حوالي ٣-٥ سنوات. و كمان الدول دي لا ينطبق عليها مبدأ الاشتراط conditionality.
تقريبا القروض دي رايحه للدول الفقيره دي كأنها معونه.
مصر خرجت من قائمه الدول الأفقر في العالم سنه ٢٠٠٠ (مصدر ٦). و ان كان موقعها الان يتدهور و مش بعيد بعد كدا سنه ترجع لها تاني.
تعليق من جوده:
سنه ٢٠٠٠ دي كانت العصر الذهبي لمبارك. لان الاقتصاد المصري كان بدأ يتحرك بعد لما انتهي البرنامج مع الصندوق و كمان بعد لما اتنازلت دول العالم عن ديونها علي مصر بعد حرب الخليج و كان وقتها بدأت المدن الجديده في النمو. وقتها كانت مصر بيقولوا عليها النمر الاقتصادي الأفريقي. لو كان مبارك ساب الحكم وقتها و عمل حياه ديمقراطيه سليمه كان حال مصر بقي مختلف تماماً. لكن الطمع في التوريث! احد اهم صفات القائد انه يعرف امتي يعتزل. حتي لعيب الكوره لازم يعرف امتي يمشي و الا يصبح مسخه.

نرجع لموضوعنا.
الاقراض المتنازل ده ملناش دعوه بيه علي الأقل في الوقت الحاضر.
٢- خط الاقراض المرن:
Flexible credit line (FCL)
ده يبقي للدول ذات الاقتصاديات القويه و لديها سياسه اقتصاديه موثوق بها و عندها تاريخ موثوق به في تطبيق سياسات اقتصاديه ناجحه. الدول بتاخد القرض كله دفعه واحده دون تقسيط. و كمان الدول دي مفيش عليها شروط او ضمانات لانها معروف ان عندها برنامج اقتصادي قوي و ناجح. الدول دي ساعات بتحتاج قرض موقت للتغلب علي مشكله مؤقته. كمان ساعات بيبقي المطلوب مش ان الدوله تاخد قرض لكن ان يبقي عندها القدره انها تاخد القرض بسرعه بدون حاجه انها تستلف من الاسواق و البنوك العالميه. في احيان كتيره ده لوحده كاف انه يطمن الاسواق ان الدول دي قادره علي التعامل مع اي مشاكل مؤقته.

في ٣ دول بس في العالم عندها النوع ده من القروض. المكسيك. بولندا. كولومبيا. دول اقتصاديتها بتنمو. المكسيك محتاجه قرض عشان تعيد هيكله صناعه البترول و الطاقه عندها. بولندا للتعامل مع تبعات مشاكل اليورو في اوروبا.
طبعا مصر مستحيل تكون من الدول دي لان معندهاش لا برنامج قوي و لا سياسه اقتصاديه ناجحه. و لا أساسا سياسه اقتصاديه أساسا. و الصندوق بيقول انه محتاج يدرس وضع مصر. معني انه لسه حيدرس ان مصر مش من الدول دي.
فده كمان نوع من القروض ملناش دعوه بيه.
٣- القروض الاحتياطية السائله:
Precautionary and liquidity line
(PLL)
النوع ده لدول ذات برامج قويه و اقتصاديات قويه و موثوق بها. لكن مش بذات قوه الدول المؤهلة للحصول علي خط الاقراض المرن. يعني بتحقق معظم شروط التأهل لخط الاقراض المرن لكن مش كلها. لكن هي دول علي الطريق السليم. و بالتالي الصندوق معندوش حاجه زياده او شروط جديده يحطها علي الدول دي لانها بتبقي بشكل عام علي الطريق السليم.

عاده الصندوق بيدي الدول دي قرض علي سته شهور او سنه او سنتين. القرض بيتقسط كل ٦ شهور. و كل ٦ شهور يتم مراجعه موقف الدوله للتأكد انها ما زالت علي الطريق السليم (ده شرط غير مطلوب في خط الاقراض المرن اللي زي ما شفنا الدوله بتاخد القرض كله مره واحده). و القرض لا يزيد عن ١٢٥٪ من حصه الدوله في الصندوق. و مجموع القروض كلها لا يزيد عن ٥٠٠٪ من حصه الدوله في الصندوق. و يجب سداد القرض في خلال فتره ٥-١٠ سنوات من تاريخ القرض.
الدوله الوحيده في العالم اللي واخده قرض من النوع ده هي المغرب. و المغرب عندها برنامج اقتصادي ناجح جدا لكن طبعا لا تحقق كل مؤهلات الدول الغنيه مثل بولندا او المكسيك. المغرب لجأت للقرض ده كاحتياط للتعامل مع ايه أزمات تنتج عن الربيع العربي.
طبعا مصر لن تحقق ايه اشتراطات من التأهل لهذا النوع من القروض. عجز موازنه بضخامة مصر مع عدم وجود سياسه اقتصاديه مع انهيار سعر العمله مع انهيار الانتاج الصناعي و الزراعي مع انهيار احتياطي البنك المركزي. كل ده ضد شروط التاهل لهذا النوع من القروض.
لذلك ده كمان نوع من القروض ملناش دعوه بيه. ده للناس الفاهمه اللي عندها حكومات بتفهم. مش احنا. يعني المجلس العسكري مثلا في ٢٠١١ كان ممكن ياخد النوع ده و يحل مشاكل كتير و يثبت الاقتصاد. لكن الجهل نقول ايه.
٤- القرض الجاهز عند الضروره:
Standby arrangement (SBA)

ده معظم القروض اللي الصندوق بيديها. و ده هدفه انه يساعد دول العالم اللي عندها مشاكل مؤقته في ميزان المدفوعات يعني اللي داخلها من العمله الصعبه اقل من اللي بتدفعه عشان الاستيراد. ارجع لمصدر ٧ عشان تفهم كل حاجه ببساطه عن ميزان المدفوعات.
يعني بالضبط موقف مصر الحالي. فالصتدوق بيجي و يقول انه حيدي الدوله دي قرض لكن في مقابل شروط. الشروط دي هي ال conditionality اللي اتكلمنا عنها فوق. القرض ده بيبقي بالتقسيط. عاده مده البرنامج بتبقي ١٢-٢٤ شهر. و سداد القرض بيكون علي ٣-٥ سنين. و مفيش فلوس بتتدفع الا لما الدوله تثبت للصندوق ان عندها برنامج مقنع عاده بيكون تقشفي. و مش بالكلام. بيبقي فيه مقاييس محدده عاده بتكون نسبه العجز في ميزان المدفوعات.. يعني عاده الصندوق يقول بعد ٦ شهور لازم نسبه العجز تقل بمقدار كذا و الا مفيش فلوس تاني.
النوع ده عاده بيبقي محدود الحجم جدا لانه فقط لتوفير مساعده محدوده المده للتغلب علي ازمه مؤقته مدتها شهور يعني و لا تزيد عن سنتين. يعني لازم تبقي عارف ان مشاكل الاقتصاد حتنتهي بعد سنتين.
النوع ده هو تقريبا نصف (مش كل) اللي اخدته مصر من الصندوق في التسعينات (مصدر ٨).
النوع ده برضه اللي أخذته اليونان من الصندوق و كان بشروط ضخمه برضه بالرغم من عضويه اليونان في اليورو. اليونان عندها ما يعادل ٣,٥ مليار دولار حصتها في الصندوق. أخذت ما يعادل ١٦ مليار دولار قرض. يعني تقريبا ٤٥٠٪ من حصتها (مصدر ٩). صعب جدا تخيل ان مصر حتاخد أكتر من ٤٥٠٪ من حصتها. حصتها حوالي ٢ مليار وحده يعني ما يعادل حوالي ٢,٨ مليار دولار. لذلك اقصي حاجه ممكن تحصل عليها مصر هو ١٢ مليار دولار اللي الصحافه المصريه و وزير الماليه بيقولهم. ده مع فرض ان مصر تتعامل زي اليونان و يبقي عندها المانيا و الاتحاد الاوروبي بيضمنوها. نشك جدا جدا ان ده يحصل. حتي لو السعوديه ضمنت مصر. السعوديه ليست بقوه الاتحاد الاوروبي و مصر لا تشترك في العمله مع السعوديه كما تشترك اليونان مع المانيا.
لكن الوضع السيئ ممكن مع وعود ضخمه بالتقشف
٥- السيوله الماليه الممتده
Extended fund facility (EFF)

النوع ده مشابه في كل حاجه للنوع السابق الا في حاجه واحده. ان مدته أطول. يعني القرض مدته بتبقي ٣ سنين. يعني كل سنه تاخد شويه فلوس علي ٣ سنين. و بعدين تسدد بعد كده علي ٥-١٠ سنين.
القرض ده للدول اللي عندها مشاكل تحتاج أعاده هيكله الاقتصاد تماماً. يعني دول مشاكلها مش مؤقته.
لو بصيت في مصدر ٨ حتلاقي ان نصف قروض مصر من الصندوق في التسعينات كانت من النوع ده.
في النوع ده الصندوق بيدي فلوس أكتر شويه علي فترات أطول. لكن طبعا بيحط شروط عاليه جدا تتطلب أعاده هيكله كبيره للاقتصاد زي ما حصل مع مصر في التسعينات.
لاحظ ان مجموع انواع القروض كلها مش حيزيد عن حدود معينه. لذلك حتي لو حصلت مصر علي نصف قروضها من النوع ده و النصف من النوع السابق كما نظن ان الوضع سيكون لن تزيد إطلاقا عن ١٢ مليار. و نعتقد انها ستكون اقل من ذلك بكثير بالنظر ان حصه مصر اقل من اليونان و لا تتمتع مصر بنفس الدعم الذي حصلت عليه اليونان.
توقعاتنا:
--------

الاقتصاد المصري في حاله يرثي لها. و لذاك ليس امام مصر الا الحصول علي قرض الصندوق. و الصندوق سيفرض شروط تقشفيه شديده و شروط لتعويم العمله علي الأقل جزئيا. و هي أمور لا تستطيع مصر تنفيذها بشكل كامل لان المخابرات ستنصح السيسي الا يطبقها خوفا من الغضب الشعبي. و ان كان سيطبق البعض لانه معندوش حل اخر. و بالتالي سيرقص علي السلم. لا اقتصادا اصلح و لا قرضا تحصل. و بالتالي لن يقتنع الصندوق بشكل كامل. و لكنه ايضا مضطر ان يمنح بسبب انهيار الوضع مقابل برنامج تقشفي مع تسريح بعض الموظفين و رفع دعم بعض انواع البنزين مجددا و تقليل مرتبات الموظفين و تقليل عجز الموازنه و تطبيق ضريبه علي كل شيئ و دمغات علي اي حاجه حتي علي الأكل لو استطاعوا و علي اي شيي يطلبه المصريون في الخارج لزياده حصيله الدوله كي تستطيع سداد قرض الصندوق.
و سيتم بيع شركات البترول و الا سيكون قرضا محدودا جدا. لو وصل القرض ١٢ مليار اعرف ان كل شيي ذي قيمه سيباع كما يبيع المفلس
و لن يحدث استثمار. و لا ثقه في الاقتصاد. و لا نمو و لا تشغيل. لان هذا يتطلب حكومه فاهمه و حريات و الاثنان لا وجود لهما.

و ما أنقذ مصر في التسعينات كان حرب الخليج و ليس الصندوق. و ستنزلق مصر اكثر نحو الفقر بينما ستسدد الحكومه القرض و تحتفل بذلك و سيبقي عيد و اجازه كمان.
و بقيه سلسله تعلم الاقتصاد كلها في مصدر ١٠.
المصادر:
-------

١- المتحدث بأسم صندوق النقد الدولي متحدثا للصحافه: http://www.imf.org/…/TR072816-Transcript-of-a-Press-Briefin…
٢- تعريف حصه كل دوله و تصويتها في صندوق النقد الدولي: https://www.imf.org/external/np/sec/memdir/members.aspx
٣- تعريف وحده السحب الخاصه: http://www.imf.org/external/np/exr/facts/sdr.htm
https://www.imf.org/external/np/fin/data/rms_five.aspx
٤- الفصل الرابع من صندوق النقد الدولي: https://www.imf.org/external/np/fin/data/rms_five.aspx
٥- مبدأ الاشتراط في صندوق النقد الدولي:
http://www.imf.org/external/np/exr/facts/conditio.htm
http://www.imf.org/external/np/exr/facts/howlend.htm
http://www.imf.org/external/np/exr/map/lending/
٦- قايمه الدول الاكثر فقرا في العالم: https://www.imf.org/external/np/pp/eng/2014/060314.pdf
٧- شرح جوده لميزان المدفوعات و تطبيقه علي مصر:
https://jawdablog.org/2015/03/22/understand_economy_08_15/
٨- تاريخ قروض مصر من صندوق النقد الدولي: https://www.imf.org/external/np/fin/tad/exfin2.aspx…
٩- حصه اليونان و قروضها من صندوق النقد الدولي: https://www.theguardian.com/…/imf-loans-dominique-strauss-k…
https://www.imf.org/external/np/sec/memdir/members.aspx
١٠- تعالوا نتعلم الاقتصاد ببساطه: https://jawdablog.org/…/%D8%AD%D9%84%D9%82%D8%A7%D8%AA-%D8…/
JAWDA's photo.
JAWDA's photo.





ليست هناك تعليقات:

إرسال تعليق