الخميس، 15 يونيو، 2017

لو عايز تطمن على حال البلد النهاردة..

لو عايز تطمن على حال البلد النهاردة..
فهيئة المفوضين بالمحكمة الدستورية أوصت بعدم قبول منازعتي تنفيذ حكم تيران وصنافير المقامة من هيئة قضايا الدولة نائبة عن الحكومة ... في الغالب عبد العال هيطلع علينا الجلسة الجاية يقولنا أحكام الدستور هي والعدم سواء
- والإعلام الفرنسي أعلن ان روسيا تسعى لابرام صفقة تسليح ضخمة مع الجيش المصري ... عشان يبقى جيشنا قوي وأي دولة تفكر انها متاخدش الأرض اللي بنعطيهلها نحاربها وتاخدها بالقوة
- وقطر عملت معانا حركة صايعة وسفيرها اللي طردناه رجعته تاني النهاردة ولكن كمندوب لقطر في الجامعة العربية ... لأ دا احنا نقطع علاقتنا بجامعة الدول وننقل مقرها من عندنا فورا بقى
- وقوى ثورية وسياسية أعلنت عن مشاركتها في مظاهرات الجمعة لا لبيع الأرض ... وهنا عايز أقول كلمتين لضباط الداخلية ... أعزائي ضباط الداخلية انتوا كان آخركم قتل، فساد، حالات فردية، تعذيب، اللي هو يعني شغل الإجرام والفساد الوسخ الوسطي الجميل ده ... لكن أحب أقولكم ان الوضع دلوقتي إتغير ودخلنا مرحلة مختلفة خالص ... خرجنا من مرحلة ياتبقى ملتزم مهنيا ياتبقى فاسد ،ودخلنا مرحلة ياتبقى "وطني" ياتبقى "خاين" ... الناس اللي خارجة دي خارجة تدافع عن أرضها بحكم التاريخ والدم وأحكام القضاء وأحكام الدستور وحتى شهادات رؤساء أركان وكبار جنرالات الجيش ... فحضراتكم دلوقتي عندكم خيار من اتنين، يا إما يكون عندكم خط أحمر وتقولوا لحد الأرض ولأ، وماتتعرضوش للمصريين اللي نازلين يدافعوا عن أرضهم ... يا إما تبقوا "خونة رسمي" وتكملوا مع الخاين لحد مشهد النهاية وتلبسوا معاه في الحيط ... بس أحب أقولكم ان انتوا دايما اللي بتشيلوا الليلة في الآخر وبتحاسبوا على كل المشاريب ... زي ما باعوكم كده في 25 يناير وجريتوا في الشوارع بالكلسون

بس والبلد بخير وزي الفل الحمد لله

ليست هناك تعليقات:

إرسال تعليق