السبت، 24 سبتمبر 2016

#عمرو_علي منسق حركة ٦ ابريل نزلوه تأديب

  #عمرو_علي منسق حركة ٦ ابريل نزلوه تأديب
 
النهارده عرفت من شباب زي الفل ان #عمرو_علي منسق حركة ٦ ابريل اللي بقاله سنه في الحبس نزلوه تأديب و شرحوا لي يعني ايه تأديب و ان ده أقصي درجات العقوبه علي المساجين بعد الحبس الانفرادي . عمرو علي اعترض علي قلة وقت التريض و التعسف في الزياره فقرروا يادبوه ..
المعتقلين السابقين و المحاميين شرحوا لي يعني ايه تأديب ..
يعني تتحبس في زنزانة صغيره جدا بلا شمس و الا اي اتصال بالعالم الخارجي و الزنزانة دي غالبا بتكون رطبه و فيها مياة علي الارض مع مجموعة من الحشرات و القاذورات و مفيش حمام . عندك جردل تستخدمة وقت ما تتزنق . 
مفيش اي حاجه تنام عليها و الارض مش مستويه ده لو قررت تنام وسط الحشرات و الميه الوسخه اللي في الارض .
الاكل بيترمي لك مره واحده و غالبا مع إهانات و احتمال كبير جدا تعدي جسدي . و كل ما اشتكيت ذادت آيام التأديب ! طبعا ده مخالف القانون و حتي ميثاق الامم المتحدة اللي مصر ماضية عليه .
في حالة عمرو علي هو بقاله ٥ ايام في التأديب و اخر كام يوم عمل إضراب عن الاكل للتصعيد ..
طبعا ده جاب نتيجه عكسية و هددوا انهم يصفوه و يتقال انه انتحر او مات لوحده زي ناس كتيره دخلت التأديب و طلعت جثة .
عمرو علي مش هو الوحيد اللي في التأديب .. فيه غيره كتير و حياتهم مهدده بالخطر و الأمراض من الوضع المرزي ده . اتكلموا عن المعتقلين و اتكلموا عن عمرو علي و حاولوا تنقذوه .
معلش مضطره اني اطلب من المشاهير و الناس ام علامة زرقاء اللي صوتهم مسموع انهم يتبنوا الموضوع ده و لأول مره هعمل منشنات للناس. فيه شباب حياتهم في خطر و احنا قاعدين نتفرج !
سوسن غريب

ليست هناك تعليقات:

إرسال تعليق