صاحبة عزومة السيسي بغيط العنب : المخابرات قالو لي محدش هينزل قبلها بيوم.

صاحبة عزومة السيسي بغيط العنب تكشف تفاصيلها: المخابرات قالو لي محدش هينزل قبلها بيوم.. وجارتي عملتلنا الأكل

 

السيدة نادية توفيق: الرئيس كان باين عليه جعان ووزير الدفاع أكل ربع رغيف.. ومن كتر الفرحة فضلت أبكي لحد ما الرئيس رضاني

طول الليل كنا قاعدين في الشارع وجُعنا والجيران قالولي شوفي عندك إيه ف تلاجتك وجارتنا قالت هعملكوا فلافل بالسمسم

كشفت السيدة نادية توفيق، ربة الأسرة التي استضافت الرئيس عبد الفتاح السيسي، أمس الاثنين، على الفطار، تفاصيل زيارته التي صوفتها بأنها «يوم عيد».

وقالت «نادية» خلال مداخلة هاتفية مع سعيد حساسين، ببرنامج «انفراد» المذاع عبر فضائية «العاصمة»، مساء أمس: «قالولي الريس هيجيلك يا نادية، من كتر الفرحة فضلت أبكي مش مصدقة نفسي هيجي لحظة وأسلم عليه».

وتابعت: «طول الليل كنا قاعدين في الشارع وجُعنا، الجيران قالولي شوفي عندك إيه ف تلاجتك، وجارتنا قالت هعملكوا فلافل بالسمسم، قلتلها حتى لو عندك جبنة قديمة حطيهالنا».

وأضافت: «الريس قالي أنا عشانكوا ومنكوا وليكوا وأنتوا حبايبي، وحضن عيالي وباسهم وراضاهم وراضاني إلهي يراضيه ويخليه».

وأكملت «نادية» المقيمة في منطقة غيط العنب: «جارتي عملتلنا فلافل وبيض عشان تحتفل بينا، وعشان كان في مخابرات و قالولنا هتقعدوا في الشقة مش هتنزلوا خالص، عملتلنا الأكل وحطت جبنة قديمة وفول وحلاوة طحينية وبيض مسلوق»، مضيفة: «أكلت رغيف أنا والريس، وكان جعان شكله ماكانش فطر وبان عليه  إنه بيخلص شغله وبعدين يفطر، وصدقي صبحي كل ربع رغيف».

وأكدت السيدة أن الرئيس نقلها وأسرتها إلى شقة مكونة من ثلاث غرف، وتابعت: «قلتله عايزة الغلابة يبقوا كل تفكيره، وكنت هقوله على مشروع بس اتحرجت قلت هيقول انتهزت الفرصة، برضك الغلابة اللي زينا حساسين شوية، والواحد بيحس قدام الناس دي إنه حاجة قليلة».