عادي جدا تبقى فى زفة أخوك ولسبب ما قسم ثاني طنطا

Mahmoud Ellisy

عادي جدا تبقى فى زفة أخوك ولسبب ما قسم ثاني طنطا يعتبر الألعاب النارية فى الزفة إهانة تستلزم نفخ وفشخ من قامو بها .
يطلع بوكس من القسم يطارد الزفة ويمسك عربية من عربيات الزفة .. كنت راكب فيها أنا وأتنين ولاد خالتي وأبوهم وإبن خالي وصاحب العربية .

بدون ولا كلمة دخلو على صاحب العربية إللى كان سايق ضربوه بكعب مسدس فى دماغه وفتحو الباب وسحلوه على البوكس .. نزلنا كلنا رافعين إدينا وركبنا البوكس .. كل إللى طلبته منهم إنهم يسيبو جوز خالتي وكفاية إحنا فما كان منهم إلا الزيادة فى الشتيمة والضرب وسب الدين .
تعرضنا جميعا فى البوكس لضرب مبرح وكل أنواع الشتايم إللى ممكن تتخيلوها .. أنا مبسكتش فى المواقف إللى زي دي بشاكس وبشتم وبرد الضربة باتنين .. ودا طبعا خلي كل تركيز الضرب عليا والتوعد بالمزيد لما نوصل القسم ..
ولما وصلنا القسم إستقبلونا بتشريفة معتبره كان لي فيها النصيب الأكبر من الضرب والركل والسحل .. أكتر حاجة كانت حارقة دمهم إني مش خايف منهم ولا عارفين يكسروني .
دا أخرك يا جبان ؟ .. دي إيد نسوان ..
دا كان ردي بأعلى صوت فيا وانا مقيد الحركة وأتلقي صفعات متكررة على وجهي من ضابط مباحث قسم تاني " محمد الغول " .
بعد تدخل وسطاء خرج جوز خالتي .. وأنا والباقي قضينا الليلة فى حجز القسم .
الصبح ركبنا عربية الترحيلات وإتعرضنا على النيابة .. وكيل النيابة كان بيضحك وهو بيقرأ المحضر إللى مكتوب فيه تشكيل إرهابي قاوم السلطات وإعتدي على القسم .. الخ الدباجة الجاهزة دي .
سألنا .. هو التشكيل الإرهابي بتاعكم متعود يهاجم الأقسام بالبدل ولا إيه " كلنا كنا لابسين بدل لزوم الفرح " ..
وريت وكيل النيابة بدلتي المقطعة وأثار الضرب اللى تعرضتله .. وتحت ضغوط الأهل وعشان عارف إنى مش هاخد معاهم حق ولا باطل .. اتلم الموضوع على كده وأخدنا إفراج من سرايا النيابة ..
‫#‏الداخلية_بلطجية‬

تعليقات:

Tarek Ramadan

القصة دى سمعتها من قريب الناس الى كانت فى الفرح من ثلاث ايام

JAWDA

مظبوط. ده كان فرح أحمد وحيد و صفاء حجازي يوم الثلاثاء الماضي في طنطا.