الواقع والمفترض
November 23, 2013 at 11:04pm
ياترى هل سألنا نفسنا ايه تأثير وسائل الاعلام الالكترونية "face book , twitter , وغيرهم " على حياتنا ؟! ليه لما تبعد عن ال social media شوية من الوقت ممكن يوصلو لعدة ايام , بتشوف الحياة بشكل مختلف
الأول خلينا نعرف شوية معلومات مهمة وبسيطة عن وسائل الاعلام
لما نحب نتكلم عن عملية " التواصل " وما تعنيه من عملية نقل الأفكار , ووسائل نقل الأفكار دى , يبقى لازم نتكلم عن مكونات عملية الاتصال وأنواعها
الاتصال ده عده انواع : _تواصل ذاتى "اللى هيا عملية التفكير وتواصل الشخص مع نفسه وعقله " _تواصل شخصى " بين اتنين Face to face " _اتصال عام "بين مجموعة كبيرة من الناس زى المحاضرات العامة " _اتصال جماهيرى "وده بيتم عن طريق وسيلة من وسائل الاعلام _راديو , تليفزيون , جريدة , نت , إلخ _
واى عملية من العمليات اللى فاتت لازم يكون في حد بيعرض معلومات وافكار , وحد بيستقبل , ورسالة من اللى طرف للتانى , و رد فعل من التانى على الأول "feed back "
وال feed back بيختلف من وسيلة اعلام لغيرها يعنى لما المتلقى يحب يقول رد فعله على كلام مكتوب ف جرنال لازم يبعت بالبريد, ويوصل بعد كام يوم , وبعدين الجريدة تشوف اذا كانت هتنشر رد فعله ولا لاء
نفس القصة ف التليفزيون بس أسهل شوية , تتصل بالتليفون وتستنى لما الكنترول يعطف ويدخلك على الهوا نيجى بقا للفيس بوك وتويتر
النوع ده من التواصل هو نوع من التواصل الجماهيرى عشان بيتم مع جمهور كبير وعن طريق وسيلة معينة اللى هيا النت وفيه مرسل ومستقبل ورسالة , والميزة الاكبر ان ال feed back بتاعه سريع ومتاح للكل بدون تعقيدات كلام حلو وجميل , فين بقا المشكلة
المشكلة يا فندم ان احنا اللى بنستخدم الكلام ده غلط جدا جدا , ازاى ؟!! بدل ما الواحد مننا يقعد يفكر ويتامل فى فكرة معينة بيتسرع , يتسرع قبل حتى ما الفكرة تكتمل وتختمر فى دماغه
وبيروح ينشرها بعد الساعة 8 بالليل عشان الوقت ده كله بيكون فاتح وهيجيله عليها لايكات وكومنتات وشير كتير يبقى كدا الفيس بوك او تويتر قضى على التواصل مع الذات بشكل بشع حاجة كمان , حول التواصل الشخصى " Face to face " اللى مكون من صوت , وتعبيرات وجه , واشارات ايد ,حولهم الى مجرد حروف مكتوبة صماء , وشوية ايموشنز , وده بيسب مساحة كبيرة جدا لسوء الفهم والظن , وبيعمل مشكلات كتير من نوع شاف الرسالة وماردش غير بعد نص ساعة عملت عنده كومنت وهو ماردش عليه , يبقى كدا تم ضرب التواصل الذاتى والتواصل الشخصى وناس كتير بتخسر بعضها حتى التواصل العام ماسلمش , ممكن نتكلم عن الجزئية دى فى وقت تانى
بدائل وحلول
طبعا اى حد يقول ان الحل انك تلغى الأكونت بتاعك خالص وترجع لأيام ما كانو بيعملو التليفونات من علب التونة ويربطو خيط فى النص يبقى عايز سمكة تونة تعضه فى ودانه
بص يا فندم !! حاول توزن الموضوع وتستخدم كل حاجة استخدامها الصحيح , يعنى مثلا :
_امشى بنوت ورق , وقلم رصاص فى جيبك او شنطتك , ولما تجيلك فكرة اكتبها
بعد نص ساعة هتجيلك فكرة تانية ف نفس الموضوع, وهكذا , اكتبها برضو ,جمع بعد اسبوع الافكار الصغيرة دى هتلاقى نفسك طلعت بفكرة عبقرية فى الآخر كاملة متكاملة مبدعة
_بدل ما بتتواصل مع اصداقائك عن طريق الفيس وتويتر حاول تقسم الموضوع شوية , فرغ قائمة الفريندز أو الفولوينج فى نفس النوت الورق ده , وحدد مين منهم محتاج تتواصل معاه بشكل دائم , ومين أقل وكتر التواصل بالفون شوية وقابل اصحابك واقعيا وخلى الانبوكس ده حاجة ثانوية
_استخدم مواقع تانية فى النت لان فكرة ان النت عبارة عن فيس بوك وتويتر بس دى فكرة عبيطة اكتر من بوحة الصباح اساسا
الخلاصة : خد قرار ان الفيس بوك وتويتر مايكونش الهم الأول ليك ف حياتك وانزل الواقع عشان تشوف الدنيا بشكلها الحقيقة واشغل نفسك بحاجة بتحبها , مش شرط انك لما تبعد عن الفيس شوية وقت تبقى مخنوق ومكتئب ومش عايز تشوف وش حد , وارد جدا انك تكون مشغول ومش عندك وقت تسيب الواقع وتروح لعالم من العوالم الافتراضية فى كل الأحوال خليك بعيد عن الافتراضى اللى زاد نسبة الملل فى الحياة ونسبة الأفورة أكتر ما هيا زيادة أصلا
ودمتيم سالمين :)
عبدالرحمن إيـــاد
ليست هناك تعليقات:
إرسال تعليق