ضرب من ضروب الخيال ولا يستطيعه حتى أقوى جهاز مخابراتى فى الدنيا

مراقبة الفيس بوك
شائعة جديدة ملأت فضاء الفيس
وكالعادة ترتعد الفرائص خوفاً من الباشا خريج هندسة إتصالات اللى بيراقبه ( بلا نيلة )
،،
أنا إستخدمت مصطلح فضاء الفيس ، لأنه أنسب وصف لملايين البشر
ممن يستخدمون الفيس فى مصر وحدها ، حضرتك بقىٰ متخيل إن الباشا اللى مش قادر
يسيطر على مظاهرات فى الشارع فيها كام ألف فى كل مظاهرة ولا عارف يجيبهم من بيوتهم
ويخمد الثورة دى من منابعها بقدرة قادر هيدخل على ملايين الحسابات ويصفيها ويتتبع
الأي بي بتاعها ويطلع عنوان حضرتك ويجى يعتقلك
،،
من الناحية العلمية الكلام ده ضرب من ضروب الخيال ولا يستطيعه حتى أقوى جهاز مخابراتى فى الدنيا
ممكن يعمله ، وهى دى قوة الفيس اللى مجنناهم
،،
بس ممكن يقدروا بحاجة تانية ، مثلاً خبر كاذب فى أى جريدة صفرا من بتاعتهم
إن تم القبض على ناشط بيحرض على الجيش والشرطة
خبر تانى فيه أرقام تليفون تتصل بيها وتبلغ عن أى حد بيعمل أى حكاية عالفيس
وكأن اللى هيبلغ ده هيبعت لينك الأكونت بتاعك فى مسج مثلاً ( عالم متخلفة )
كل ده ولا حاجة ولا ليه أى أثر فى الواقع
بس هما هيقدروا يسكتونا لما حضرتك تاخد الخبر وتنقله وتخوف صحابك
الفيس كبير ،، أكبر مما تتخيل ،، بس اللى أكبر منه
خيبتنا التقيلة فى نقل أى هرى وخلاص ،، وخوفنا من السراب